2022 жылғы 17 маусымда Нұрпейіс Байғанин атындағы облыстық балалар кітапханасы Абай гүлзарында Ақтөбе облысының 90 жылдық мерекесіне орай «Ақтөбе... Ақ адырлы Абыз дала» атты кітап көрмесін ұсынды.       Кітапхана қызметкерлері арайлы Ақтөбе қаласының кешегі тарихи болмысы мен бүгінгі ажары туралы баяндады.
     Оқырмандар назарына өркенді өңіріміздің шежіресінен, облысымыздағы аудандар тарихынан сыр шертетін тарихи-танымдық, мәдени-әлеуметтік тұтас ақпарат беретін энциклопедиялар мен қатар жергілікті ақын-жазушылардың шығармалары ұсынылды.

     «Желкен» әдеби клубының мүшелері Ақтөбе қаласына арналған тебіреніске толы өлеңдер оқыды.

     2022 жылдың 15 маусымы Абай гүлзарында біздің кітапхана «Батырлар жыры – балалар әлемінде» тақырыбында кітап көрмесін ұйымдастырды.

     Еліміздің даңқын даралаған батыр бабаларымыздың есімін ұлықтау мақсатында көрмеге «Батырлар жыры» бес томдық кітабы және Қобыланды, Ер Тарғын, Қамбар батыр, Райымбек, Қанжығалы Бөгенбай, Керей мен Жәнібек, Есет Көкіұлы, Батыр Науан, ер Едіге сынды алаш ерлері туралы кітаптар қойылды. Сондай-ақ, «Мәдени мұра» мемлекеттік бағдарламасы аясында жарық көрген «Бабалар сөзі» жүз томдық кітабының батырлар жыры топтастырылған 33- 36 томдары қала тұрғындарына ұсынылды.

     Кішкентай оқырмандарымыз Нан батыр, Алпамыс батыр, Ер төстік және тағы да басқа батырлар туралы ертегілер мен «Еркетай», «Kazakh man» сынды комикс кітаптармен танысты.

     2022 жылғы 15 маусым күні Н.Байғанин атындағы облыстық балалар кітапханасына «Magic Castle» балабақшасы қонаққа келді. Балаларға ертегілер, 3D панорамалық кітаптар, танымдық энциклопедиялар және дыбысты кітаптар таныстырылды. «Балдырған» журналындағы жұмбақтардың шешімін тауып, «Балбұлақ», «Айгөлек», «Балақан», мерзімді басылымдарға қызығушылықтарын танытты.

     2022 жылғы 13 маусымда Н.Байғанин атындағы облыстық балалар кітапханасына №67 орта мектебінің жазғы лагерінің оқушылары қонаққа келді. Балалар «Кел танысайық, бұл...» сериясымен шыққан «Өнертабыстар», «Жұлдыздар және ғаламшарлар», «Теңіз» энциклопедияларымен танысып, қоршаған ғажайып әлем туралы өз білімдерін толықтырды. Балаларға арналған «Айгөлек», «Балақан», «Балалар әлемі», «Балдырған» журналдарында берілген ертегі кейіпкерлерінің суреттін бояп, сканворд, жұмбақтар шешті.

     2022 жылғы 10 маусымда Нұрпейіс Байғанин атындағы облыстық балалар кітапханасы «KIDS BOOK FEST – 2022» фестивалі аясында Абай гүлзарында Ақтөбе облысының 90 жылдық мерекесіне орай «Менің құтты мекенім, сені мақтан етемін» атты өлкетану сағатын өткізді.

     Кітапхана қызметкерлері күн сайын өсіп өркендеп келе жатқан құтты мекен Ақтөбе облысының жылдар белесіндегі сан қырлы жетістіктерін, талай тарихи тұлғалар шыққан, бірлігі мен ынтымағы жарасқан Ақтөбе туралы ақпарат берді. «Желкен» әдеби клубының мүшелері «Ару қалам Ақтөбем» атты әдеби-монтаж ұсынды.

     Оқырмандар назарына балалардың рухани мәдениетін байытып, туған елі мен жерін қастерлеуге тәрбиелеу мақсатында «Бірі жасын сөзімен, бірі жауһар жырымен» атты кітап көрмесі ұсынылып, жергілікті ақын-жазушылардың шығармалары насихатталды.

     2022 жылғы 2 маусым күні   Н.Байғанин атындағы  облыстық балалар кітапханасы 4 маусым – мемлекеттік рәміздер күніне арнап М.Құсайынов атындағы дарынды балаларға арналған мамандандырылған мектеп-интернатында «Киелі, қасиетті, құдіретті, қәдірле, Рәміздерді, жүрекпенен!» патриоттық сағат ұйымдастырды.

     Шарада Тәуелсіздігіміздің басты құндылықтарының көрінісі болған халқымыздың мұқалмас рухын, қаһармандығы мен даналығын жеткізетін құнды белгі - мемлекеттік рәміздеріміз туралы терең ақпарат берілді. Жас жеткіншектердің отансүйгіштік сезімін оятып, рәміздерді құрметтеуге үндейтін өлең-жырлар жатқа оқылып, мемлекеттік рәміздердің айбыны мен қадірі асқақтатылды.

     Оқырмандар назарына «Рәміздер – ұлттың киесі, рухтың тірегі» атты кітап көрмесі ұсынылды.