2023 жылғы 18 мамыр күні Н.Байғанин атындағы облыстық балалар кітапханасы Мемлекет қайраткері Темірбек Жүргеновтің туғанына 125 жыл   толуына орай «Азаттық жолындағы жарқын тұлға» атты тарих сағатын өткізді. Өскелең ұрпақ санасында Темірбек Жүргеновтің өмір жолы мен қоғамдық-саяси қызметін насихаттау мақсатында ұйымдастырылған шарада ұлтын ардақтаған көрнекті тұлғаның отызыншы жылдар ойранындағы көрген қиындықтары мен жазықсыз жалаға ұшырағаны жөнінде, ел мүддесі үшін атқарған ерең еңбегі ел тарихында мәңгілік сақталып, кейінгі ұрпаққа үлгі болатыны туралы кеңінен әңгімеледі.

     «Желкен» әдеби клубының мүшелері ақындар Жақсыбай Сарбалаевтың «Қайта оралды ол бүгін», Сақтаған Есмахановтың «Асыл аға», Мәлік Аяповтың «Жүргеновтің соңғы сөзі» өлеңдерін оқыды. Оқырмандар назарына «Ұлтын ардақтаған ұлы тұлға» атты кітап көрмесі ұсынылды.

     2023 жылдың 11 мамырында «Кітап Ұstar» және «Атадан қалған ғибрат» жобалары аясында «Жаңылмай жаңылтпашты жатқа айтайық» сайысы өтті. Оқырмандардың ой дәлдігін, сөйлеу мәдениетін жетілдіру және жаңылтпаштарды мүдірмей, жылдам оқу дағдыларын дамыту мақсатында ұйымдастырылған сайыс ІV кезеңнен тұрды.

I – кезең. «Топ атауын табайық». Қатысушылар шашылған пазлыларды құрастыру арқылы топтың атауын тапты

II – кезең. «Жаңылтпаш айт, жаңылма». Бұл кезеңде қатысушылар жаңылтпаш айтып жарысқа түсті.

III – кезең. «Ара ұясы». Сайысқа түсушілер ара ұясында жасырынған жұмбақтарды шешу арқылы қоржындарын балға толтырды

IV – кезең. «Ойна да ойла» . Қатысушылар «жаңылтпаштар» сөзінен 1 минут ішінде бірнеше сөздер құрастыру арқылы жеңіс жолына бір табан жақындады.

     Сайысқа қатысқан №31 қазақ орта мектебінің балалары өздерінің білімге құштарлығын және озық ойлы екендіктерін көрсетті. Шара соңында балалар Мұзафар Әлімбаев, Бейсебай Кірісбаев, Қастек Баянбай сынды қаламгерлердің жаңылтпаш-өлеңдерімен танысып, кітапханаға саяхат жасады.

      Жеңіс күні қарсаңында Н.Байғанин атындағы облыстық балалар кітапханасы №42 жалпы білім беретін мектептің 5-сынып оқушыларымен «Ұлы Жеңіс жасасын!» тақырыбында ерлік сағатын өткізді.

      Шарада жанымен, қанымен, күшімен, ісімен, ерлігімен, атаның туын жықпай, ананың намысы үшін туған жердің топырағын жауға таптатпай, бейбіт өмірін сыйлаған Ұлы Отан соғысының қаһармандары – Бауыржан Момышұлы, Рақымжан Қошқарбаев, Әлия Молдағұлова, Мәншүк Мәметова т.б. туралы ақпарат беріліп, тағзым етілді. Балалар Қасымхан Бегмановтың «Намысынан халқының жаратылған», Қайрат Жұмағалиевтің «Жеңіс жыры», Ж.Өмірбековтің «Қаһарман» өлеңдері оқылып, «Жеңіс туы, желбіре!» әнін орындады. «Желбірей бер, Жеңіс туы, мәңгілік!» кітап көрмесі ұсынылды.

     2023 жылғы 4 мамырында Н.Байғанин атындағы облыстық балалар кітапханасы «Кітап. Тұлға. Рух.» жобасы аясында Ақтөбе облысы грек-рим, еркін күрес Федерациясының Вице-Президенті Алмас Жұмағалиев және әлем чемпионы Хамза Алмасұлы Төреханмен «Өрісті өнеге» атты сыр-сұхбат өткізді.

     Шараға «Айсын» балалар радиосының шәкірттері мен жас спортшылар, «Атамекен» өлкетану клубының мүшелері белсене қатысты.

     Шара қонағы Алмас Төреханұлы жас ұрпақтың рухани байлығын көтеру, адамның тұлға болып қалыптасуында кітаптың маңызы үлкен екендігін, сондай-ақ, оқыған кітабыңдағы айтулы кейіпкерге еліктеудің өзі, тіпті автордың өзі сияқты тұлға болуға құлшыну ой-санаңды өсіріп, жақсыға үйретіп, жаманнан жирендіретінін тілге тиек етті. Өзінің және ұлы Хамзаның спортқа келуі мен жетістіктерін айта отырып, адам өмірінде спорттың маңыздылығын да айтып балаларды салауатты өмір салтын ұстануға және спортпен шұғылдануға шақырды. Өз кезегінде Хамза спорт арқылы күш, жылдамдық, ептілік қасиеттерін дамытудың үлгісін көрсетті.

     «Спорт- салауатты өмір бастауы» кітап көрмесі ұсынылды.

     Биыл Қазақстан Республикасының Қарулы күштерінің құрылғанына  31 жыл. 2023 жылдың 3 мамырында Отан қорғаушылар күні қарсаңында Н.Байғанин облыстық балалар кітапханасы №2 мектеп-гимназиясының оқушылары арасында «Ұранды елдің ұрпағы қайсар» әскери-патриоттық сағатын өткізді. Іс-шара Қазақстан Республикасының Мемлекеттік гимнің орындалуымен ашылды. Кітапханашылар Қазақстан Республикасының Қарулы Күштері туралы ақпарат берді. Болашақ ел қорғайтын батырларымыз арнау өлеңдерің оқып, домбырамен «Сал күрең» күйін тартып, Өтебай Тұрманжановтың «Туған өлкем» жырынан шашу шашты. Шара соңында Рауан Бейсенұлының «Ән сал, сарбаз» әні шырқалды.

     Сонымен қатар кітапханадағы тарихи, әскери әдебиеттерге кеңінен шолу жасалып, «Ер – елінің айнасы» атты кітап көрмесі таныстырылды. Оқырмандарды кітап көрмесімен таныстыру барысында  ел тарихындағы баға жетпес із қалдырған ержүрек батырлардың өмір жолы мен күрескерлігін жаңа, тың қырынан тани алатын А.Тасболатовтың «Қазақтың хас батырлары» атты ғылыми танымдық энциклопедиясы және Қайлолла Ахметжанның «Ер қаруы бес қару» сынды кітаптарына және  Екінші дүниежүзілік соғыстың даңқты жауынгері, әскери қолбасшы Бауыржан Момышұлының қаһармандық мінезі мен жайнаған жастық шағы, соғыс жылдарындағы өмірі қамтылған «Қаһарман Бауыржан Момышұлы» атты фотосуреттер мен деректер қамтылған кітаптарына шолу жасалды.

     Қазақстан халқының бірлігі күні қарсаңында кітапханамыз №11 орта мектеп-гимназиясының Достық алаңында библиомикс өткізді. 3-сынып оқушыларының назарына «Дружба народов - счастливые дети» атты кітап көрмесі ұсынылды.

     Шарада балалар достық тақырыбында өлең оқып, мақал-мәтел айтудан жарысып, әдеби викториналық сұрақтарға жауап берді.