Н.Байғанин атындағы облыстық балалар кітапханасында  «Кітап. Тұлға. Рух» жобасы жүзеге асырылып, оқырмандардың  рухани дамуына мүмкіндіктер беруде.

     Жобаның мақсаты – балалардың  оқу мәдениетін арттыру; адамгершілік, рухани, қазақстандық патриотизмді қалыптастыру; балаларға үлгі болатын облыстың танымал, жетістікке жеткен тұлғаларымен (жазушы, кәсіпкер, спортсмен, суретші, әнші және т.б.) таныстыру.

     2022 жылғы  21 қыркүйек күні жоба аясынды жергілікті қаламгерлермен кездесу кеші ұйымдастырылды.

     Шараға ақын, журналист, өнер зарттеушісі Нұрлыбек Амандәулетұлы Қалауов, детектив жанрын дамытушы, аудармашы, баспасөз қызметінің үздігі Зияш Қалиқызы Телеуова және  Қазақстан жазушылар одағының мүшесі, жас ақындардың жанашыры, ақын Гүлімай Әбішқызы қатысып, тағылымды әңгімелерін айтып, балалардың білім көкжиегін кеңейтсе, жазушылық қолтаңбасы бір-біріне мүлде ұқсамайтын, әрқайсысы әр түрлі мектептің мықты өкілі болып саналатын ақтөбелік қаламгерлермен жүзбе-жүз сұхбаттасудың сәті түскенде оқырмандар көкейлерінде жүрген сауалдарын қойып, еркін сұқбаттасты.

     «Желкен» әдеби клубының мүшелері қаламгерлердің шығармаларын оқып, кітап оқудың маңыздылығы туралы өз ойларымен бөлісті.

     14 қыркүйек күні Н.Байғанин атындағы облыстық балалар кітапханасында  Отбасы күніне арналған «Жанұя кешені – жылулық мекені» кездесу  кеші өтті.

     Шараға "Шаңырақ" отбасылық оқу клубының мүшелері және Мырзалиевтар, Тұяқовтар отбасылары қатысты.

     Шара барысында ұстаз, ардақты ана, ақжаулықты әже Ұлмекен Қаниқызы Тұяқова ел ішін ауыз біршілікке, білімге, елін, жерін қорғауға шақырған қазақтың қанатты сөздері жайлы ой-толғаныстарымен бөлісіп, бабадан қалған даналық сөздің құдіретін бағалай білуге шақырды.

     Ал Мырзалиевтар отбасының тірегі Ержан Ауезханұлы кітаппен жақын екендігін, оқыған қызықты кітаптары туралы әңгімелесе, отанасы Фарида Мырзалиева бала тәрбиесінің маңыздылығын айтып. балаларды кітап оқуға шақырды.

     №8 орта мектептің оқушылары Анель Ерланқызы, Айару Амантаева,  Сабина Болатова Ахмет Байтұрсынұлының «Қозы мен Қасқыр» шығармасынан көрініс көрсетсе, №62 Б.Момышұлы атындағы орта мектептің оқушысы Жанерке  Мергенова «Ата-әже» әнін тарту етті.

     Шарада оқырмандар «Кім тапқыр?» ойынында  берілген сөздерден  отбасы, кітап туралы мақал - мәтелдер мен нақыл сөздер құрастырды.

     «Бақытты отбасы» кітап көрмесіне библиографиялық шолу жасалды.

     2022 жылғы 13 қыркүйекте Н.Байғанин атындағы облыстық балалар кітапханасы ақын, жазушылар одағының  мүшесі Мұхтар Құрмалиннің туғанына  95 жыл толуына орай  «Өздеріңмен біргемін» ақпарат сағатын  № 42 жалпы білім беретін орта мектептің 7 класс оқушылары арасында  өткізді.

     Шара басында  балалық шағын соғыс жылдары тез есейткен, өзінен кейінгі талай жас буынның қанаттануына ықпал  еткен ақынның өнеге толы өмірінен сыр шертілді. Туған жерге деген перзенттік махаббатынан туған патриоттыққа толы өлеңдері мен балаларға арнап жазған сыршыл жүрекке жылы тиетін өлеңдері оқылып, таныстырылды.

     Оқырмандар назарына «Өлеңім өз жанымның парасаты» атты кітап көрмесі ұсынылды.

     2022 жылғы 8 қыркүйекте біздің кітапханаға «Зерде» жеке мектебінің оқушылары қонақта болып,  кітап әлеміне саяхат жасады. Жас оқырмандар танымдық балалар энциклопедияларына, 3D форматтағы кітаптарға қызығушылық танытты. Сонымен қатар «Айгөлек», «Балақан», «Балдырған», «Балалар әлемі», «Мөлдір бұлақ» журналдарымен танысты.

      2022 жылдың 26 тамызы күні Н.Байғанин атындағы облыстық балалар кітапханасы Абай гүлзарында Қазақстан Республикасының Конституциясы күніне арналған  «Ата заңым – елімнің рухы»   атты ақпарат сағатын өткізді.

      Өскелең ұрпақты құқықтық сауаттылыққа, Ата заңымызды құрметтеуге бағытталған шарада Конституция ұғымы, тараулары, қабылдануы, қазіргі  қолданысы жөнінде жөнінде кеңінен айтылды.

     «Алтын Заң аясында» кітап көрмесі» атты кітап көрмесі ұсынылды. Белсенді оқырмандарымыз Ақселеу Сейдімбек, Алмас Темірбай, Сәбит Баймолдиннің  тәртіп, заң туралы өлеңдерін жатқа оқып, викториналық сұрақтарға жауап берді.

     2022 жылдың 26 тамызда Абай гүлзарында «KIDS BOOK FEST-2022» фестивалі аясында біздің кітапхана «Біз күштіміз, ептіміз!» тақырыбында кітап көрмесін ұйымдастырды. Көрмеге спорт туралы энциклопедиялар, қызықты кітаптар ұсынылды. Балалардың спортқа деген қызығушылығын арттыру мақсатында спорттық ойындар ойнатылды. Дұрыс тамақтану мен күнделікті жаттығулардың пайдасы да кішкентай бүлдіршіндерге айтылды.