«Қазақстандық салалық мәдениет, спорт және ақпарат қызметкерлерінің кәсіп одағы» ҚБ Ақтөбе облыстық филиалының төрағасы Табельдинова Назира Сарсембаеваның ұйымдастыруымен Қазақстан Республикасының Кәсіподақтар күніне орай кездесу кеш өтті.

Кеш барысында жоғары сыныпқа қызмет көрсету бөлімінің бөлім меңгерушісі Ідрісова Кәмила Сәмсинқызы Алғыс хатпен марапатталды.

2023 жылдың 10 қазан күні Н.Байғанин атындағы облыстық балалар кітапханасы «Болашақ мұра» қоғамдық қорының балалары арасында «Жайдары күз, жомарт күз» тақырыбында ертеңгілігін өткізді.

Шара барысында балалар жеміс-жидектерге қатысты қызықты жұмбақтар шешіп, «Бауда әлде бақшада» ойынымен қатар «Зиянды және пайдалы тағамдар» атты танымдық ойының ойнады.

Балалардың назарына тақырыптық  кітап көрмесіне библиографиялық шолу ұсынылды.

Шара соңында балаларға берекелі де мерекелі күз мезгілінің жеміс-жидектерге толы себеті сыйға тартылды.

5 қазан «Жасыл әлем» экологиялық клубы мүшелерінің кезекті отырысы өтті. Экологиялық білім мен мәдениетті қалыптастыру мақсатында  «Жасыл әлем сұрақтары» тақырыбында квест ойыны ұйымдастырылды. Қоршаған ортаны қорғау, ластамау, қоқыстарды қайта өңдеу туралы бейнеролик көрсетілді. Балалар «Қоқысты сұрыптап үйренейік» ойынына қатысып, сұрыпталған қоқыс арқылы табиғат тазалығына септігін тигізетіндерін түсінді.

Келесі кезекте жағдаяттарды шешу арқылы бұлақ көзін таза ұстау, су жағасына қоқыс тастамау, ағаш бұтақтарын сындырмау секілді зиянды әрекеттердің алдын алды.

Квест ойынының соңғы кезенінде жұмбақтар шешу арқылы, жер шарының екінші бөлігін құруға ат салысты.

Балалардың назарына «Жеріңді аяла, адамзат» кітап көрмесіне библиографиялық шолу ұсынылды. Оқырмандар сұрақтар қойып өздерінің қоршаған ортаны қорғауға қатысты ойларын жеткізді.

2023 жылғы  4 қазан   күні  Н.Байғанин атындағы  облыстық балалар кітапханасы Ғ.Ақтаев атындағы №6 мектеп-гимназиясында оқушыларды отансүйгіштікке баулып, туған жерге деген адалдықты санасына ұялату мақсатында  драматург, жазушы, Бөкей Оралханның туғанына  80 жыл толуына орай «Мәңгілік ғұмырға айналған қаламгер» атты cторителлинг өткізді.

Шара барысында жазушының шығармашылық қабілеті, ойының ұшқырлығы, жазушылар арасындағы іс-әрекеттері жайында ақпарат берілді.  «Қайдасың қасқа құлыным», «Кербұғы», «Тортай мінер ақбоз ат» шығармаларының мазмұны түсіндірілді.

Тақырыптық кітап көрмесіне библиографиялық шолу жасалып,  қаламгер шығармалары жинақталған 7 томдық «Таңдамалы шығармалары», «Қамшыгер», «Үркер ауып барады», «Өнерге өлердей-ақ ғашық едім», «Мұзтау», «Ауыл хикаялары» тағы басқа да кітаптары таныстырылды.

         2023 жылғы 2 қазан күні  Н.Байғанин атындағы облыстық балалар кітапханасы Халықаралық қарттар күніне орай «Құрмет пен ізет құшағында»  әдеби-музыкалық кеш өткізді. Шарада  мәдениет пен өнер саласына еңбегі сіңген аға буын өкілдеріне, кітапхан ардагерлеріне алғыс айтылып, құрмет көрсетілді.

Кітапхананың белсенді өнерлі оқырмандары «Қарттарын құрметтеген ел ардақты» әдеби-сазды бағдарламасын ұсынып,   ән шырқап, көтеріңкі көңіл силады. М.Құсайынов атындағы  дарынды балаларға арналған мамандандырылған лицей-интернатының «Дара» театр үйірмесінің мүшелері Т.Ахтановтың «Әке мен бала» пьесасынан сахналық қойылым көрсетті.

Өз кезегінде ардагерлер ізгі лебіздерін айтып, ризашылықтарын білдірді.

2023 жылғы 26 қазанда Н.Байғанин атындағы облыстық балалар кітапханасы «Бір ел – бір кітап» республикалық акциясы аясында қарымды қаламгер, жазушы, драматург, қоғам қайраткері Төлен Әбдікұлының шығармашылығына арналған «Әке сағынышы» тақырыбында сюжеттік талдау сағатын өткізді.

№42 жалпы білім беретін орта мектеп оқушыларымен өткен шарада жазушының әдеби мұрасы таныстырылып, шығармаларының ерекшеліктері, шығарма кейіпкерлерінің дара, табиғи болмыстары жайында айтылып, «Әке» повесі кеңінен талқыланды. Оқырмандар Төлен Әбдіктің «Әке» повесінен ойға не түйгендерін, шығарма несімен қызықтырғанын ортаға салып, пікір алмасты.

Шара соңында оқырмандар Төлен Әбдікұлының шығармашылығына арналған «Ұлтын сүйген ұлы адам»  кітап көрмесінен «Көкжиек» , «Әке» , «Оң қол», «Парасат майданы», «Қайырсыз жұма», «Қонақтар», «Истина» атты  әңгімелер мен повестер жинақтарымен танысты.