2024 жылғы  21  мамырда Н.Байғанин атындағы облыстық балалар кітапханасы Балалар мен жасөспірімдер шығармашылығы орталығымен бірлесе 312 атқыштар бригадасы дивизиясы мен 101 атқыштар бригадасының құрметіне арналған Зеңбірек ескерткіш-белгісінің жанында Ақтөбе қаласының 155 жыл толуына арналған «Абыз дала, аңыз дала – Ақтөбе»  әдеби-сазды кешін ұйымдастырды.

            Шара қонағы Қазақстанның Құрметті азаматы, Мәдениет саласының үздігі, Жазушылар одағының мүшесі, ақын, сазгер, аудармашы,журналист, Гүлсамал Төрединқызы Аймаханова талай тарихи тұлғалар шыққан, бірлігі мен ынтымағы жарасқан Ақтөбе қаласы туралы және күн сайын өсіп өркендеп келе жатқан құтты мекен Ақтөбе  қаласының жылдар белесіндегі  сан қырлы өзгерістерін мақтанышпен айтып, мерекемен құттықтады.

"Балалар мен жасөспірімдер шығармашылығы орталығы" өнерпаздары мен «Қазанғап атындағы өнер мектебінің,  № 48 мектептің жыр сүйер оқырмандары  «Ару қалам Ақтөбем»  атты әдеби-сазды бағдарлама ұсынды.

Қатысушылар назарына «Өсе бер, өркендей бер, құтты мекен- Ақтөбе»  атты кітап көрмесі ұсынылып, жергілікті ақын-жазушылардың шығармалары насихатталды.

2024 жылғы 16 мамыр күні Н.Байғанин атындағы  облыстық балалар кітапханасы «АРМАН. ЖІГЕР. ЖЕТІСТІК» жобасы аясында «Талантымен танылғандар»  тақырыбында кездесу кешін өткізді.

Шараға Т.Ахтанов атындағы облыстық драма театрының актрисасы, «Құрмет» орденінің иегері, Мәдениет саласының үздігі, театр анасы Шалқия Ауғанбайқызы Бақытжанова, «Алақай» қуыршақ театрының актері Әбжет Еламан Манарбекұлы және «Айсын» балалар радиожурналистика мектебінің оқушысы Еркеназ Асхатқызы Калиева қатысты.

        Сұхбат барысында қонақтар өздерінің өнерге қалай келгендігін және сахна сыртындағы қызықтар туралы оқырмандармен бөлісе отырып, театр өнерінің қоғамдық-мәдени маңызын түсіндірді.

Мәдениеттің алғашқы мектебі – қуыршақ театрының актері Еламан Манарбекұлы кішкентай көрерменнің көз алдында әлемді сиқырға айналдырып жіберетін қуыр­шақ жүргізу өнері­нің қыр-сы­­рымен бөлісті.

Еркеназ Калиева балаларға арналған «Айсын» радиосының жұмысы, көркемсөз оқу өнерінде жеткен жетістіктері туралы баяндап, оқушыларды кітап оқуға шақырды.  

 Өнер саласына қызығушылық танытқан оқушылар өз көкейлеріндегі сұрақтарға жауап алып, пікірлерімен бөлісті.

         Оқырмандар назарына «Өнер ізгілікке үндейді» кітап көрмесі ұсынылды.

Н. Байғанин атындағы облыстық балалар кітапханасында «Атадан қалған ғибрат» жобасы аясында  «Оқы және жеңіске жет!» атты сайыс өткізілді. Оған  М. Құсайынов атындағы Ақтөбе облыстық дарынды балаларға арналған мамандандырылған лицей-интернатының 5 сынып оқушылары белсене қатысты. Балаларға ең алдымен сергіту сәті ретінде «Секіртпе» ойыны ойнатылып, олармен жақынырақ танысуға мүмкіндік туды. Сайыстың «Кіл мықтыдан, шын мықты!» кезеңінде оқушылар «Этнокубик» ойыны арқылы есеп жұмбақтардың жауабын тапты. «Ойлы болсаң, озып көр!» кезеңінде сұрақтарға «Дұрыс және бұрыс» ойыны арқылы жауап берді. Ал «Тапқыр болсаң, тауып көр!» кезеңінде оқушылар қазақтың тұрақты сөз тіркестерінің мағынасын түсіндірді. Қызықты, әрі тартысты ойын болып, балалар қонақкәде ретінде күй тартып, мәнерлеп өлең оқыды.

2024 жылғы 15 мамыр – Халықаралық отбасы күні Н.Байғанин атындағы облыстық балалар кітапханасында  «Шаңырақ» отбасылық оқу клубының отырысына  «Кітаппен дос отбасы» сайыс өткізілді.

Сайысқа «Шаңырақ» отбасылық оқу клубының мүшелері Илеубаевтар, Канапиндер, Серіковтер, Сүйіншбектер отбасылары қатысты.

Шараның мақсаты: отбасылық кітап оқу дәстүрін жандандыру, кітап оқу мәдениетін жетілдіру.

Сайыс 4 кезеңнен тұрды.

1.кезең «Отбасым – мақтанышым». 

2.кезең. «Өнерлі отбасы өрге жүзеді» 

3.кезең «Ұшқыр ой, ұтымды жауап»    

4.кезең   «Отбасының сүйікті кітабы»

«Бақытты отбасы» атты кітап көрмесіне библиографиялық шолу жүргізілді. Көрмеге Н.Құдайбергенұлының  «Даналық әліппесі»  сериясымен шыққан «Халық жыры», «Бесік жыры», «Нақыл сөз», «Халық ертегісі», Отбасы хрестоматиясы «Әлдиден эпосқа дейін», С.Кенжеахметұлының «Қазақтың салт-дәстүрлері мен әдет-ғұрыптары», З.Ахметованың «Бабалар аманаты», С.Мұқановтың «Халық мұрасы» және тағы басқа  әдебиеттер қойылды.

2024 жылдың 14 мамырда   патриоттық тәрбие беру мақсатында  Заречный тұрғын алабы мектеп-балабақша кешенінің  4- класс оқушыларымен «Сыбайластық – қоғам дерті» тақырыбында  квиз  өткізілді.

Шара барысында балаларға , жемқорлық  жайында ақпарат беріліп, бейнеролик көрсетілді.  Оқушылар тақырып бойынша қойылым көрсетті. «Ой жалғау» ойын кезеңінде аяқталмаған сөздің жалғасын тауып, «Литмонтаж»  бөлімінде жемқорлыққа қарсы өлең шумақтарын оқыды.

     «Адал еңбек еткенге,Бақыт басын иеді» атты кітап көрмесі таныстырылды.

         2024 жылдың 4 мамырында Ғ.Ақтаев атындағы мектеп гимназиясының мәжіліс залында Кеңес Одағының Батыры Сағадат Нұрмағамбетовтың туғанына 100 жыл толуына арналған «Қазақтың қайсар ұлы» патриоттық  кеш ұйымдастырылды.

         Шара барысында халық қаһарманы С.Нұрмағамбетовтың өмірбаяны, ерлігі мен жанқиярлық қызметі туралы терең айтылды. Өткенге хат жазу арқылы қатысушылар Ұлы Отан соғыс ардагерлеріне алғыстарын білдіріп, тағзым етті.

Жеңіс, Отан туралы патриоттық өлеңдер оқылып, Балалар мен жасөспірімдер шығармашылық үйінің оқушысы  Дәулет Әлемби «Егемен ел Қазақстан» атты әнімен шараны аяқтады.

        Оқырмандар назарына «Ерлік даңқы ешқашанда өшпейді» кітап көрмесі ұсынылды.